प्रियंका दुतराज
२०८२ फागुन २३, शनिबार ०१:२२
जेनजी आन्दोलनको बलमा बनेको अन्तरिम सरकारबाट राजीनामा दिएर चुनावी मैदानमा उत्रिएका चार पूर्वमन्त्रीहरूको प्रारम्भिक नतिजा सार्वजनिक भएको छ। प्राप्त विवरणअनुसार एक जना पूर्वमन्त्री पराजित भएका छन् भने दुई जनाले फराकिलो अग्रता कायम गरेका छन्।
काठमाडौं निर्वाचन क्षेत्र नम्बर ३ मा पूर्वउर्जामन्त्री कुलमान घिसिङ पराजित भएका छन्। उनलाई राष्ट्रिय स्वतन्त्र पार्टी (रास्वपा) का उम्मेदवार राजुनाथ पाण्डेले ७,५८६ मतान्तरले पराजित गरेका हुन्। निर्वाचन अधिकृत चमिला भट्टराईका अनुसार विजयी पाण्डेले १८,७५७ मत प्राप्त गर्दा उज्यालो नेपाल पार्टीका घिसिङले ११,१७१ मतमा चित्त बुझाएका छन्।
ललितपुर र म्याग्दीमा पूर्वमन्त्रीहरूको अग्रता
ललितपुर–२ मा रास्वपाका उम्मेदवार रहेका पूर्वसञ्चारमन्त्री जगदिश खरेलले ५,५९९ मतका साथ फराकिलो अग्रता लिएका छन्। उनले नेपाली काँग्रेसका प्रेमकृष्ण महर्जनलाई निकै पछि पार्दै जिततर्फ अग्रसर देखिएका छन्।
त्यस्तै, म्याग्दीमा स्वतन्त्र उम्मेदवार रहेका पूर्वशिक्षामन्त्री महावीर पुनले प्रतिस्पर्धीसँगको मतान्तर निकै बढाएका छन्। पुनले ५,५०८ मत प्राप्त गर्दा उनका निकटतम प्रतिस्पर्धी नेपाल कम्युनिष्ट पार्टी (एमाले)का हरिकृष्ण श्रेष्ठले २,०७१ मत मात्र ल्याएका छन्। पुन अहिले ३,४३७ मतले अगाडि छन्। सो क्षेत्रमा नेपाली कम्युनिष्ट पार्टीका अर्जुनबहादुर थापाले १६५६ र कांग्रेसले १४९७ मत पाएका छन्।
अर्का पूर्वमन्त्री बब्लु गुप्ता उम्मेदवार रहेको सिराहा–१ मा भने अझै मतगणना सुरु भएको छैन। उनी रास्वपाबाट चुनावी प्रतिस्पर्धामा छन्। अन्तरिम सरकारका मन्त्रीहरूले बीचमै पद छाडेर चुनावमा होमिएका कारण यी क्षेत्रहरूको नतिजालाई निकै चासोका साथ हेरिएको छ।
अन्तरिम सरकारबाट राजीनामा दिएर चुनावी मैदानमा उत्रिएका पूर्वमन्त्रीहरूको प्रदर्शनले अहिले जनमत कता झुक्दैछ भन्ने स्पष्ट संकेत दिन थालेको छ। केही क्षेत्रमा उनीहरूले बलियो अग्रता लिएका छन् भने केहीले भने पराजयको सामना गरेका छन्, जसलाई राजनीतिक वृत्तमा चासोका साथ हेरिएको छ।
यो खबर पढेर तपाईलाई कस्तो महसुस भयो ?
कुल मतदान: 0
काठमाडौं । महिला, बालबालिका तथा सामाजिक सुरक्षामन्त्री सीता वादीले देशका विभिन्न भागमा रहेका बाल सुधार गृहहरूलाई केवल दण्ड दिने थलो नभई शिक्षा, सुधार र पुनःस्थापना केन्द्रका रूपमा विकास गर्ने प्रतिबद्धता व्यक्त गरेकी छन्। प्रतिनिधि सभाको कानून, न्याय तथा मानव अधिकार समितिको बैठकमा बोल्दै उनले बाल न्याय प्रणालीलाई बालमैत्री बनाउन बालबालिकासम्बन्धी
Loading brands...
