काठमाडौँनेपाल टेलिकमले अन्तर्राष्ट्रिय बहिर्गमन कलका लागि लागू हुने पल्स ड्युरेसनमा परिवर्तन गरेको छ। नयाँ व्यवस्था अनुसार अब विभिन्न देशमा गरिने अन्तर्राष्ट्रिय कलमा ६० सेकेन्डको पल्स दर लागू हुने भएको छ।
नेपाल दूरसञ्चार प्राधिकरणको फागुन १ गतेको निर्णयअनुसार स्वीकृत नयाँ व्यवस्था जेठ १ गतेदेखि लागू हुने टेलिकमले जनाएको छ। यो व्यवस्था नेपाल टेलिकमको फोन तथा मोबाइल सेवा प्रयोग गरी अन्तर्राष्ट्रिय एक्सेस कोड ००, १४२४, १४२५ र १४४५ मार्फत गरिने बहिर्गमन कलमा लागू हुनेछ।
टेलिकमका अनुसार नयाँ प्रणाली अन्तर्गत ५८ देशमा ६० सेकेन्ड पल्स ड्युरेसन कायम गरिएको छ। यसमा अमेरिका, चीन, भारत, ब्राजिल, मेक्सिको, साउदी अरेबिया, सिंगापुर, दक्षिण कोरिया, श्रीलंका, थाइल्यान्ड, टर्कीलगायतका देश समावेश छन्।
त्यसैगरी अफ्रिका, एसिया, युरोप र ओसिनिया क्षेत्रका विभिन्न मुलुकहरूमा समेत यो व्यवस्था लागू हुने जनाइएको छ। अल्जेरिया, नाइजेरिया, इथियोपिया, दक्षिण अफ्रिका, म्यानमार, भियतनाम, फिजी, सामोआ, पपुआ न्युगिनी, टोगो, टोंगा र भानुआतुजस्ता देशहरूमा पनि ६० सेकेन्ड पल्स दर लागू हुनेछ।
नेपाल टेलिकमले अन्तर्राष्ट्रिय कल सेवाका लागि विभिन्न एक्सेस कोड प्रणाली सञ्चालन गर्दै आएको छ। सेवाग्राहीले कल गर्दा पहिले एक्सेस कोड, त्यसपछि सम्बन्धित देशको कोड र सेवा प्रदायकको नम्बर डायल गर्नुपर्ने व्यवस्था रहेको कम्पनीले जनाएको छ।
कम्पनीका अनुसार नयाँ व्यवस्थाले अन्तर्राष्ट्रिय कल सेवामा थप स्पष्टता, सहजता र संरचनात्मक सुधार ल्याउने अपेक्षा गरिएको छ।
