काठमाडौँ ।
नेपाली बजारमा लगातार तीन दिनसम्म बढेको सुनको मूल्य आज (बुधबार) घटेको छ। नेपाल सुनचाँदी ब्यवसायी महासंघका अनुसार सुनको भाउ तोलामा १ हजार २०० रुपैयाँले घटेर २ लाख ९७ हजार ३ सय रुपैयाँ कायम भएको छ। हिजो (मंगलबार) सुन तोलाको २ लाख ९८ हजार ५ सय रुपैयाँमा कारोबार भएको थियो।
गत आइतबारदेखि मंगलबारसम्म तीन दिनमा ६ हजार ५ सय रुपैयाँले बढेको सुनको मूल्यमा आज गिरावट आएको हो। सुनसँगै आज चाँदीको भाउ पनि घटेको छ। चाँदी तोलामा १० रुपैयाँले घटेर ४ हजार ९८० रुपैयाँ कायम भएको छ।
यसअघि गत माघ १५ गते सुनको मूल्य हालसम्मकै उच्च ३ लाख ३९ हजार ३ सय रुपैयाँ पुगेको थियो भने चाँदी पनि सोही दिन ७ हजार ५०५ रुपैयाँको ऐतिहासिक उचाइमा पुगेको थियो। माघ १८ गते भने चाँदीको मूल्यमा हालसम्मकै उच्च १ हजार ५६५ रुपैयाँको गिरावट आएको थियो।