काठमाडौँ
प्रमुख प्रतिपक्षी दल नेपाली काँग्रेसले प्रधानमन्त्री बालेन्द्र शाह (बालेन)को स्वास्थ्य अवस्थाबारे प्रश्न उठाउँदै तत्काल स्वास्थ्य परीक्षण गर्न माग गरेको छ।
मंगलबार प्रतिनिधिसभा बैठकमा बोल्दै कांग्रेस संसदीय दलका नेता भीष्म राज आङदेम्बेले सरकारको नीति तथा कार्यक्रम प्रस्तुत भइरहँदा प्रधानमन्त्री बीचैमा उठेर बाहिरिएको भन्दै स्वास्थ्य अवस्थाबारे स्पष्टता आवश्यक रहेको बताएका हुन्।
आङ्देम्बेले यदि स्वास्थ्य समस्याका कारण प्रधानमन्त्री बाहिरिएका हुन् भने तत्काल स्वास्थ्य परीक्षण गरी त्यसको विवरण संसद्लाई जानकारी गराउनुपर्ने माग गरे। उनले यस्तो व्यवहार सामान्य नहुने भन्दै सरकारसँग स्पष्ट जानकारी माग गरे।
उनले प्रधानमन्त्रीको व्यवहारलाई ‘अमर्यादित र अहंकारपूर्ण’ भन्दै यसले संसदको गरिमा र इज्जतमा असर परेको टिप्पणी गरे। साथै, उनले सरकारको आधिकारिक धारणा पनि सार्वजनिक गर्नुपर्ने बताएका छन्।