काठमाडौँ।
काठमाडौं–३ बाट नवनिर्वाचित सांसद राजुनाथ पाण्डेले राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह (बालेन) नै अबको प्रधानमन्त्री हुने दाबी गरेका छन्। मंगलबार काठमाडौंमा पत्रकारहरूसँग कुरा गर्दै पाण्डेले पार्टीको आधिकारिक निर्णय र लाइनविपरीत अभिव्यक्ति नदिन पार्टीका नेताहरूलाई कडा चेतावनी दिए।
पार्टीका उपसभापति डीपी अर्यालले बालेनलाई पाँच वर्ष प्रधानमन्त्री बनाउने सहमतिबारे आफूलाई जानकारी नभएको भनी दिएको अभिव्यक्तिप्रति टिप्पणी गर्दै पाण्डेले त्यसलाई 'गैरजिम्मेवार' भनेका छन्। "यदि उहाँले त्यसो भन्नुभएको हो भने त्यो गैरजिम्मेवार कुरा हो, जुन जनताले सहँदैनन्," उनले भने, "रास्वपाले जे बोल्छ, त्यही गर्छ। हाम्रो प्रधानमन्त्रीको उम्मेदवार बालेन शाह नै हो, यसमा कुनै भ्रम नरहोस्।"
सांसद पाण्डेले पार्टीका कुनै पनि तहका नेतालाई दायाँबायाँ कुरा गर्ने छुट नभएको स्पष्ट पार्दै मिडियामा बोल्दा संयमित हुन र पार्टीको आधिकारिक धारणाभन्दा बाहिर नजान आग्रह गरे। उनले व्यक्तिपिच्छे फरक–फरक धारणा आउँदा जनतामा गलत सन्देश जाने भन्दै नेतृत्वलाई सचेत गराएका छन्।