सजिलो पत्रिका
२०८३ वैशाख २६, शनिबार १०:४७
काठमाडौँ ।
अर्थमन्त्री डा. स्वर्णिम वाग्लेले निजी क्षेत्रका उद्योगी व्यवसायीलाई सरकारले धरपकड गर्न लागेको भन्ने हल्ला निराधार रहेको स्पष्ट पारेका छन् । शुक्रबार काठमाडौँमा आयोजित एक कार्यक्रममा बोल्दै मन्त्री वाग्लेले व्यवसायीहरू सरकारको विकासका साझेदार भएको र उनीहरूलाई दुःख दिने कुनै मनसाय वा सूची सरकारसँग नरहेको बताएका हुन् ।
पछिल्लो समय व्यवसायीहरूमाझ व्याप्त त्रासलाई सम्बोधन गर्दै अर्थमन्त्री वाग्लेले भने, "व्यवसायीलाई थुन्ने वा दुःख दिने कुनै सूची सरकारले बनाएको छैन, तपाईंहरू हल्लाको पछि नलाग्नुस् । तपाईंहरू त सरकारको विकासका साझेदार हुनुहुन्छ, शत्रु होइन ।"
अर्थमन्त्रीले सरकारले १०० बिलियन डलरको अर्थतन्त्र निर्माण गर्ने महत्त्वाकाङ्क्षी लक्ष्य राखेको र यसमा निजी क्षेत्रको भूमिका अपरिहार्य रहेको उल्लेख गरे । उनले सरकारका पाँच मुख्य प्राथमिकताहरू—सुशासन, अर्थतन्त्रको पुनरुत्थान, कनेक्टिभिटी, सामाजिक लगानी र पर्यटनमार्फत 'सौम्य शक्ति' (Soft Power) विस्तारबारे व्यवसायीहरूलाई प्रस्ट पारेका थिए ।
छिमेकी मुलुक भारतको आर्थिक विकासको उदाहरण दिँदै डा. वाग्लेले सन् २०१४ मा नरेन्द्र मोदीले सत्ता सम्हाल्दा भारतको आर्थिक सूचकहरू अहिलेको नेपालकै हाराहारीमा रहेको स्मरण गराए । "सही नेतृत्व र स्पष्ट नीतिका कारण आज भारतले विश्व अर्थतन्त्रमा ठुलो फड्को मारिसकेको छ, नेपाल पनि अब त्यही बाटोमा अघि बढ्छ," उनले दाबी गरे ।
अर्थतन्त्रको वर्तमान दिशा बदल्न सरकारले गृहकार्य गरिरहेको बताउँदै उनले आगामी बजेटसम्म धैर्य गर्न व्यवसायीहरूलाई आग्रह गरे । निजी क्षेत्रको सक्रिय सहभागिता र विश्वासबिना मुलुकमा आर्थिक समृद्धि सम्भव नभएको भन्दै उनले सरकार व्यवसायीमैत्री वातावरण बनाउन प्रतिबद्ध रहेको दोहोर्याए ।
यो खबर पढेर तपाईलाई कस्तो महसुस भयो ?
कुल मतदान: 0
काठमाडौँ । राष्ट्रपति रामचन्द्र पौडेलले विकास निर्माणको केन्द्रमा मानव र प्रकृतिलाई राख्नुपर्नेमा जोड दिएका छन्। नेपाल इन्जिनियर्स एसोसिएसनको ६४औँ वार्षिकोत्सवलाई सम्बोधन गर्दै उनले विकासको अवधारणा जनताको कल्याण र मुलुकको समृद्धिसँग जोडिनुपर्ने बताए।जलवायु परिवर्तनको बढ्दो चुनौतीलाई मध्यनजर गर्दै अबका पूर्वाधारहरू दिगो, पर्यावरणमैत्री र 'हरित विकास' को सिद्धान्तमा आधारित हुनुपर्ने राष्ट्रपतिको भनाइ
Loading brands...
