राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष
रवीन्द्र मिश्रले आफ्नो छैटौं कृति ‘माथिको आदेश छ हिरासतमा कविता’ सार्वजनिक गरेका छन्। राजधानीमा आयोजित लोकार्पण समारोहमा उनले कृतिका माध्यमबाट देशको राजनीतिक, नैतिक र सामाजिक अवस्थामाथि कठोर टिप्पणी गरेका छन्।
मिश्रले नेपाली राजनीतिप्रति जनताको विश्वास घट्दै गएको बताए र आफ्नो पुस्तालाई ‘नेपालको इतिहासकै सबैभन्दा पापी पुस्ता’ भएको अभिव्यक्ति दिएका छन्। उनले भने, आफ्नो पुस्ताले भ्रष्टाचार र स्वार्थको बाटो रोजेको कारण विगतका पुस्ता भन्दा नैतिकता र धर्ममा कमजोर भएको छ।
मिश्रले आफ्नो पुस्ताको तुलना विगतका पुस्तासँग गर्दै भने, “हाम्रा बाउबाजेहरू अशिक्षित र विपन्न भए पनि पतित थिएनन्, तर हाम्रो पुस्ता मन्दिर बनाउँदा पनि भ्रष्टाचार गर्छ।” उनले भ्रष्टाचार र नैतिक पतनको कारणले वर्तमान पुस्ताको आलोचना गरेका छन्।
कृतिमा मिश्रले आफ्नो ५० दिनको हिरासत अनुभव समेटेका छन्। उनी भन्छन् कि कुनै गल्ती नगरी पनि हिरासतमा राखिएको अनुभवले उनलाई राजनीतिक र कानूनी प्रणालीमा गम्भीर प्रभाव परेको महसुस गराएको छ।
मिश्रले हिरासत अनुभवबाट राज्यका संवैधानिक निकायहरू–प्रहरी, महान्यायाधिवक्ताको कार्यालय र अदालत–राजनीतिक प्रभावमा रहेको देखेको बताए। उनले राजनीतिक छाँयामा यी निकायहरूले निष्पक्ष काम गर्न नसक्ने अवस्थाबारे चर्चा गरेका छन्।
