लागूऔषध र लुटपाटमा संलग्न ७ जना काठमाडौंबाट पक्राउ

काठमाडौँ ।

नेपाल प्रहरीले राजधानीका विभिन्न स्थानबाट लागूऔषध कारोबार र लुटपाटमा संलग्न समूहका सात जनालाई पक्राउ गरेको छ। प्रहरीले ४० किलोग्राम गाँजासहित पाँच जना र बसमा यात्रा गरिरहेकी महिलाको सुनको सिक्री लुट्ने दुई जनालाई पक्राउ गरी सार्वजनिक गरेको हो।

जिल्ला प्रहरी परिसर काठमाडौंका सूचना अधिकारी अपिलराज बोहराका अनुसार, काठमाडौंको कोटेश्वरस्थित एक डेरामा लुकाइछिपाइ राखेको अवस्थामा ४० किलो गाँजा बरामद गरिएको हो। गाँजाको कारोबार र बिक्री वितरणमा संलग्न रहेको आरोपमा धादिङ गजुरी गाउपालिका–४ का निराजन चेपाङ, प्रकाश चेपाङ र शङ्कर चेपाङ तथा काठमाडौँ महाराजगञ्जका जीवन प्रजा र सुमन चेपाङलाई पक्राउ गरिएको छ। उनीहरूको साथबाट प्रहरीले रु. १ लाख २५ हजार नगदसमेत बरामद गरेको छ।

यस्तै, प्रहरीले चोरी तथा डाँका मुद्दामा संलग्न दुई जनालाई पनि पक्राउ गरेको छ। गत चैत २९ गते पोखराको अम्मरसिंह चोकबाट लेखनाथतर्फ जाँदै गरेको बसमा एक महिलाले घाँटीमा लगाएको दुई तोलाको सुनको सिक्री लुटपाट गरेको अभियोगमा उनीहरु पक्राउ परेका हुन्।

पक्राउ पर्नेमा काभ्रेपलान्चोक बेथानचोकका अञ्जन तामाङ र काठमाडौँ गोकर्णेश्वर नगरपालिकाका सुरेश तामाङ रहेका छन्। उनीहरूलाई काठमाडौँको गोकर्णेश्वर–४ बाट पक्राउ गरी थप कारबाहीका लागि जिल्ला अदालतबाट म्याद थप गरेर अनुसन्धान अगाडि बढाइएको प्रहरीले जानकारी दिएको छ।