काठमाडौँ।
नेपाली काँग्रेसका सभापति गगन थापाले आगामी निर्वाचनपछि गठन हुने कांग्रेस नेतृत्वको सरकारले २०४६ सालदेखिका सबै ठूला भ्रष्टाचार काण्डहरूको छानबिन गर्ने घोषणा गरेका छन्। बिहीबार सुर्खेतमा आयोजित चुनावी सभालाई सम्बोधन गर्दै थापाले भ्रष्टाचार नियन्त्रणमा कुनै सम्झौता नगर्ने र आफ्नै परिवारका सदस्य संलग्न भए पनि कारबाही गर्ने प्रतिबद्धता जनाए।
"अबको पाँच वर्ष कांग्रेस नसुस्ताउने समय हो," थापाले भने, "हाम्रो नेतृत्वको सरकारमा भ्रष्टाचार भएको कुरा जनताले सुन्नु पर्ने छैन। हामी २०४६ देखिका फाइल खोल्न उच्चस्तरीय आयोग बनाउँछौँ र त्यसको सिफारिस कडाइका साथ कार्यान्वयन गर्छौँ।"
सभापति थापाले नेपाल कम्युनिष्ट पार्टी (एमाले), नेपाली कम्युनिष्ट पार्टी र राष्ट्रिय स्वतन्त्र पार्टी (रास्वपा) लाई एउटै मञ्चमा उभिएर आगामी ५ वर्षको योजना र एजेन्डामा बहस गर्न चुनौती दिए। उनले विपक्षीहरूले केवल गालीगलौज र 'स्टन्ट' मात्र गरिरहेको आरोप लगाउँदै कांग्रेससँग देश विकासको स्पष्ट खाका रहेको दाबी गरे।
कर्णालीका मतदाताहरूलाई सम्बोधन गर्दै उनले अब 'नयाँ प्रयोग' वा 'चटक' गर्नेहरूको पछि नलाग्न आग्रह गरे। "हिजो कर्णालीमा मान्छे मारिँदा नक्कली शरणार्थी बनेर बाहिर मस्ती गर्नेहरूले आज चटक देखाउँदैमा नपत्याउनुस्," उनले भने। थापाले २०८२ देखि २०८७ सम्मको अवधिलाई देशको 'स्वर्णिम काल' बनाउने संकल्प गर्दै बदलिएको कांग्रेसलाई साथ दिन अपिल गरे।