सजिलो पत्रिका
२०८२ फागुन ०२, शनिबार २१:२३
1
"नेपालमा केही छैन" भन्दै दैनिक हजारौँ युवाहरू विमानस्थलबाट बाहिरिइरहेका बेला एकजना युवा उद्यमीले भने स्वदेशमै सम्भावनाको पहाड उभ्याएका छन्। दोलखाको मेलुङ गाउँपालिका वडा नं. ३ का निर्वाचित वडा अध्यक्ष समेत रहेका बसन्त लामाको जीवनकथा आज धेरैका लागि प्रेरणाको स्रोत बनेको छ।
१३ वर्षअघि विदेशको मोह त्यागेर स्वदेश फर्किएका लामाले हाल नेपालको चर्चित फुड चेन “The Burger House And Crunchy Fried Chicken” मार्फत व्यावसायिक सफलताको शिखर चुमेका छन्।
संघर्षको त्यो ‘अन्डरग्राउन्ड’ सुरुवात
बसन्त लामा १३ वर्षअघि नेपाल फर्कँदा हातमा ठूलो पुँजी थिएन, तर मनमा केही गर्ने दह्रो संकल्प थियो। उनले एउटा सानो ‘अन्डरग्राउन्ड’ सटरबाट आफ्नो व्यावसायिक यात्रा सुरु गरेका थिए। "मैले सानो ठाउँबाट संघर्ष सुरु गरेको थिएँ," उनी सम्झन्छन्, "आज त्यही सानो प्रयासले ठूलो आकार लिएको छ।"
उनको नेतृत्वमा अहिले ‘द बर्गर हाउस’ मात्र होइन, ‘मेलुङ थकाली’ पनि सफलताका साथ सञ्चालनमा छ। यतिमा मात्र सीमित नभई उनले अहिले ‘मेलुङ मार्ट’ र ‘मेलुङ होटल’ समेत सञ्चालनको अन्तिम तयारीमा पुर्याएका छन्।
६ हजारलाई रोजगारी, १० हजारको लक्ष्य
व्यापार मात्र होइन, लामाले समाजमा पुर्याएको योगदान अझ लोभलाग्दो छ। हाल उनका विभिन्न उद्यमहरूमा करिब ६ हजार नेपालीले प्रत्यक्ष रोजगारी पाएका छन्। उनले आगामी ५ वर्षभित्र यो संख्यालाई १० हजार पुर्याउने महत्वाकांक्षी लक्ष्य राखेका छन्।
उनले सामाजिक सञ्जालमार्फत आफ्नो अनुभव बाँड्दै लेखेका छन्, "सम्भावना विदेशमा मात्र होइन, आफ्नै देशमा छ। विदेशमा होइन, आफ्नै देशमा अवसर खोजौँ। नेपालमै केही गर्न सकिन्छ।"
राजनीति र उद्यमको संगम
नेकपा (एमाले) बाट निर्वाचित वडा अध्यक्ष लामाले राजनीतिलाई सेवा र उद्यमलाई समृद्धिको आधार बनाएका छन्। विदेशिने साथीहरूप्रति सहानुभूति राख्दै उनी भन्छन्, "बाध्यता वा पढाइको सिलसिलामा विदेश जानुहुने साथीहरूको मनमा पनि नेपालप्रतिको माया र चिन्ता छ, त्यो साँचो देशप्रेम हो। तर, त्यही ऊर्जा देशमै खर्चिने हो भने हामीले सोचेभन्दा राम्रो नतिजा निकाल्न सक्छौँ।"
नयाँ पुस्तालाई सन्देश: ‘सुरुवात गर्नुहोस्’
आफ्नो सफलतालाई उदाहरणका रूपमा प्रस्तुत गर्दै लामाले नयाँ पुस्तालाई आँट गर्न आग्रह गरेका छन्। "तपाईंहरू पनि सुरुवात गर्नुहोस्, भोलि तपाईंले मभन्दा पनि धेरैलाई रोजगारी दिन सक्नुहुनेछ," उनको यो सन्देशले स्वदेशमै केही गर्न चाहने युवाहरूमा नयाँ उत्साह थपेको छ।
दोलखाको एक विकट गाउँबाट आएर राजधानीको व्यावसायिक जगतमा साम्राज्य खडा गरेका बसन्त लामाको यो यात्राले स्पष्ट पार्छ— इच्छाशक्ति र निरन्तरको संघर्ष भए नेपालमै स्वर्ग फलाउन सकिन्छ।
बसन्त लामा हाल मेलुङ गाउँपालिका-३ का वडा अध्यक्ष हुनुका साथै 'द बर्गर हाउस एण्ड क्रन्ची फ्राइड चिकेन' का फाउन्डर/सिईओ हुन्।
यो खबर पढेर तपाईलाई कस्तो महसुस भयो ?
कुल मतदान: 0
काठमाडौँप्रतिनिधिसभा सदस्यको निर्वाचनसँगै प्रत्यक्ष र समानुपातिकतर्फको नतिजा सार्वजनिक भएको छ । राष्ट्रिय स्वतन्त्र पार्टी पहिलो, नेपाली काँग्रेस दोस्रो, नेपाल कम्युनिष्ट पार्टी (एमाले) तेस्रो र नेपाली कम्युनिष्ट पार्टी (नेकपा) चौथो पार्टी बनेको छ । यस पटक सीमान्तृकत समुदायको उपस्थिति कमजोर देखिएको छ । प्रत्यक्षतर्फ १६५ मध्ये जम्मा १४ जना (८.४८ प्रतिशत) छ
Loading brands...
