काठमाडौँ,असाढ ०१ ।
मोरङको कानेपोखरी गाउँपालिकामा शनिबार साँझ भएको मोटरसाइकल दुर्घटनामा परी एक जना प्रहरी सहायक हबल्दारको मृत्यु भएको छ। दुर्घटनामा उनकी श्रीमती र दुई वर्षीया छोरी घाइते भएका छन्।
इलाका प्रहरी कार्यालय पथरीका प्रहरी नायब उपरीक्षक मोहन विक्रम दाहालका अनुसार मृत्यु हुनेमा इलामको जमुनास्थित प्रहरी चौकीमा कार्यरत प्रहरी सहायक हवल्दार जितेन्द्र चौधरी रहेका छन्। उनी बेलबारी नगरपालिका-४ का स्थायी बासिन्दा हुन्।
पूर्वपश्चिम राजमार्ग अन्तर्गत कानेपोखरी गाउँपालिका-७, डाँसमोरङ्गी पुल नजिकैको डाइभर्सनमा चौधरीले चलाएको प्र १-०२-०४३प २४७१ नम्बरको मोटरसाइकल अनियन्त्रित भई दुर्घटना भएको थियो।
चौधरी श्रीमती र छोरीसहित पथरीबाट कानेपोखरीतर्फ आफ्नो घर फर्कने क्रममा साँझ करिब ८:०० बजे दुर्घटनामा परेका हुन्। दुर्घटनामा घाइते भएकी उनकी श्रीमती विमला धिमाल र दुई वर्षीया छोरी जेसनको विराटनगरस्थित नोबेल मेडिकल कलेजमा उपचार भइरहेको छ। विमलाको कान र खुट्टामा तथा छोरीको टाउकोमा चोट लागेको छ। मृतक चौधरीकी श्रीमती विमला पनि श्रीमानसँगै जमुना प्रहरी चौकीमा कार्यरत प्रहरी जवान हुन्।
प्रहरीको प्रारम्भिक अनुसन्धान अनुसार तीव्र गतिका कारण मोटरसाइकल अनियन्त्रित भएको हो। हाल काकडभिट्टा-लौकही सडकखण्ड निर्माणको क्रममा रहेकाले पूर्वपश्चिम राजमार्गका विभिन्न स्थानमा बनाइएका डाइभर्सनहरू असुरक्षित हुँदा दुर्घटनाको जोखिम बढेको छ।
