काठमाडौँ।
अत्यधिक गर्मी बढेपछि धनगढी उपमहानगरपालिकाले नगरभित्रका सबै सामुदायिक तथा संस्थागत विद्यालय चार दिनका लागि बन्द गर्ने निर्णय गरेको छ। उपमहानगरका शिक्षा अधिकृत जयराज जैशीले सोमबार एक सूचना जारी गर्दै असार ९ गतेदेखि १२ गतेसम्म विद्यालयमा बिदा दिइएको जानकारी दिएका हुन्।
पछिल्लो केही दिनदेखि धनगढी र आसपासको क्षेत्रमा तापक्रम ४० डिग्री सेल्सियसको आसपास पुगेको छ। चर्को गर्मीका कारण विद्यार्थीहरूको स्वास्थ्यमा प्रतिकूल असर पर्न सक्ने र विभिन्न स्वास्थ्य समस्या देखिन सक्ने सम्भावनालाई मध्यनजर गर्दै विद्यालय बन्द गरिएको उपमहानगरले जनाएको छ। यो बिदा पछि वर्षे वा हिउँदे बिदाबाट मिलान गरिने सूचनामा उल्लेख छ।
